Miir – Zur Suche nach der eigenen Identität (Zitat aus „Festvers“ von Helmut Pfisterer)

Oogfanga honderddausend Joahr narr no viel meh hänse bäschdeld ond brobierd sense emmer wieder onsere Miader nooch weil dia so scheene Ärschla ghedd hen sen onsere Miader emmer wieder a wengle miader worra weil onsere Vädder so schee saua kenna hen ond hense midanander uffam Wiesle em Wäldle hendaram Bischle an ons gschaffd d Schdoizeid lang uffam Bärafell onderam Bärafell d Bronzezeid lang uff dr Kuahhaut onder dr Kuahhaut die ganz Zeid Daag ond Nachd gschaffd on sich oogschdrenggd dass ons geba kenna soll …… Scho d Kelda so heisse Tübba on dia Keldamädla erschd wenn dia reemische Legionär endlich mol ihr Schildle ens Egg neigloind hend Narr en hauferlei Germana Hunna Mongola Slawa Zuagreisde Reigschmeggde Eigmeindede Reichsdeidsche Abghauene Schweda Franzosa Juda Jenische Ungarnhusara sodde on sodde hiesiche on ned ganz hiesiche an Haufa Flichdleng emmer wieder Flichdleng on andere scheene Leid weils Bladz gä hod wega dr Peschd wega älle dene Soldada ihre scheene Säbl on iberhaupd se dadrwega gern aus älle Hemmlsrichdonga komma sen zom Midmacha on Midbäschdla mid roode schwarze greane blaue on drondernei blonde Hoar (grad so wia heid uff dr Keeenigschdross) bis ONS endlich gäba hod….. SCHWOOBA! SCHWOOBA! em Earn em Suddrai onderam Schässloh uff dr Beehne uff dr Schdross em Gärdle uff dr Mischde em Gschäfd SCHWOOBA! SCHWOOBA! Lauder Brachdsmädla Brachdskerle on Brachdsbachel Haubdkerle wo schaffa kennad on sich ooschdrengad uffam Schässloh onderam Schässloh on bäschdlad….weiderbäschdlad dass emmer no meh geid von ons ooheimlich wichdige kernxonde Diggkepf on Riebelesmeggl!

(c) Helmut Pfisterer, Ilustrationen Utz Krais

Festvers von Helmut Pfisterer, Silberburg-Verlag, ISBN/EAN 978-3-87407-321-9